PISO ORATOR ET SERVUS
Pupius Piso, orator Romanus, servis praeceperat, ut tantum ad interrogata responderent neve quicquam praeterea dicerent. Evenit, ut Clodium, qui tum magistratum gerebat, ad cenam invitari juberet. Hora cenae instabat; jam aderant ceteri convivae omnes; solus Clodius exspectabatur. Piso servum, qui solebat convivas vocare, aliquoties emisit, ut videret, veniretne. Cum tandem jam desperaretur ejus adventus, Piso servo: “Dic”, inquit, “num non invitasti Clodium?” - “Invitavi”, respondit ille. - “Cur ergo non venit?” - “Quia venturum se negavit”. - Tum Piso: “Cur id non statim dixisti?” Respondit servus: “Quia non sum a te interrogatus”